2025 оны 1 дүгээр сарйн 11-нд болсон жагсаалын үеэр иргэдийн барьсан лоозон, шаардлагыг өөрчлөн фэйсбүүкт түгээжээ. Тухайлбал, СЭР Монголчуудаа нэртэй хуудаснаас эвлүүлсэн хэд хэдэн зургийг “ЖАГСААЛ гэнэ үү⁉. Монголыг дараагийн украйн болгох гэсэн сүнсээ худалдагсад ард түмний бухимдлыг сайхан ашиглаж байна. Хэрсүү байцгаа” гэх тайлбартай түгээсэн (архивласан хувилбар)нь нийт 238 реакц, 38 сэтгэгдэл авч, 312 удаа цааш түгээгджээ.(энд, энд бас энд).
FACTCHECK: Бид дараах байдлаар баримт шалгалт хийлээ
Шалгасан мэдээлэлд хавсаргасан зураг бүрд эвлүүлэг орсон эсэхийг шалгахаар MeVer хэрэглүүрийг ашиглахад иргэдийн барьсан лоозон хэсэгт эвлүүлэг орсон байх магадлал 90-ээс дээш хувьтай байгааг харуулж байна (энд, энд, энд бас энд). Доорх зурагт шалгасан мэдээлэлд хавсаргасан зураг болон эвлүүлэг орсон эсэхийг харуулсан үр дүнг харьцуулан харууллаа.
2025 оны 01 дүгээр сарын 11-нд “Баримт нэн тэргүүнд” сүлжээний гишүүн байгууллага NTV телевиз, iToim.mn мэдээллийн сайт зэрэг хэвлэл мэдээллийн байгууллага шууд дамжуулалт хийх үеийн бичлэгээс иргэдийн барьсан самбар дээрх бичгийг харах боломжтой.
Мөн Эрх чөлөөний эвсэл намын тэргүүн Б.Цацралын барьсан “Ц.Элбэгдорж Монголын аврал” гэсэн бичигтэй хар даавуу нь “Огцор” гэсэн лоозон байсныг өөрчилснийг олон зургаас харж болно. Бусад эх сурвалжаас зургийг хайхад Mongolian Press Agency (MPA) гэрэл зургийн агентлагийн сайтад ”Агаарын бохирдол, татварыг эсэргүүцсэн иргэд Сүхбаатрын талбайд жагсаж байна” гарчигтайгаар 01 дүгээр сарын 11-ээс эхэлсэн жагсаалын зургийг цаг тухайд нь нийтлэн оруулжээ. Үүнд Эрх чөлөөний эвсэл намын тэргүүн Б. Цацралын “Огцор” гэх бичигтэй хар туг барин зогсож буй зургийг нийтэлсэн байна.
Мөн Ikon мэдээллийн сайтад 2025 оны 1 дүгээр сарын 11-нд “MPA агентлагийн онцгой зөвшөөрөлтэй ашиглав” гэдэг тайлбартай фото мэдээнээс Б.Цацрал “Огцор” гэсэн бичигтэй хар даавуу барин зогсож буй зургийг харж болох юм.
Эх сурвалж: Ikon мэдээллийн сайт
Шалгасан зурагт эвлүүлэг орсон эсэхийг шалгах Mever хэрэглүүрийг ашиглахад Б. Цацралын барьж буй даавуун дээрх хэсэгт өөрчлөлт оруулсан байх магадлал 87 хувьтай байгааг харуулж байна.
