2024 оны арван нэгдүгээр сарын 19-нд Tserenkhuu Ishtseden нэртэй хаягаас “Дэлхийн улс орнуудын 100к хүн тутамд ноогдох умайн хорт хавдрын жагсаалтыг олж үзлээ Эхний 50д л лав МОНГОЛ УЛС алга Яахав дээ бас 1юмаар ч гэсэн анхаарал татсан орон биш л юм байна Хүүхэд аятай баярлав хэхэ” гэх мэдээллийг түгээсэн нь нийт 449 реакц, 49 сэтгэгдэл авч, 47 удаа цааш түгээгджээ.
- Энэ нь “умайн хүзүүний хорт хавдраас айх хэрэггүй, эхний 50-д байхгүй” гэх ойлголт өгөхөөр байгаа ч хорт хавдрын ажиглалтын жагсаалтыг 100 мянган хүн ам тутамд ногдох тоогоор гаргадгийг дурдаагүй. Түүнчлэн умайн хүзүүний хорт хавдрын нийт тохиолдлын 60 хувийг эзэлдэг Ази тивд Монгол Улс дөрөвдүгээрт байна.
FACTCHECK: Бид дараах байдлаар баримт шалгалт хийлээ
Шалгасан мэдээлэлд “Монгол Улс умайн хүзүүний хорт хавдраар дэлхийд эхний 50-т ч байхгүй байна” гэх агуулгыг дурдсан. ДЭМБ-ын Хорт хавдрын судалгааны олон улсын агентлагаас гаргадаг хорт хавдрын ажиглалтын жагсаалтыг 2022 оны байдлаар гаргажээ. Тус жагсаалтад Монгол Улс 100,000 хүн тутамд 20.2 умайн хүзүүний хорт хавдрын тохиолдлоор дэлхийд 53-т жагссан байна.
2022 оны байдлаар дэлхий даяар умайн хүзүүний хорт хавдрын 662,301 тохиолдол бүтгэгдсэн. Үүнээс 60 хувь нь буюу 397,082 нь Азид бүртгэгдсэн байна.
Умайн хүзүүний хорт хавдрын талаас илүү хувийг эзэлж буй Азийн орнуудаас Монгол Улс 100,000 хүн тутамд ноогдох хавдрын тохиолдлоор 4-т жагсаж, хавдрын шалтгаант үхлийн тохиолдлоор 5-т жагссан байгааг доорх зургаас харах боломжтой.
Шалгасан мэдээлэлд дурдсанчлан умайн хүзүүний хорт хавдрын тохиолдлоор дэлхийд эхний 50-д биш 53-т жагссан ч умайн хүзүүний хорт хавдрын тохиолдлын талаас илүү хувийг эзэлдэг Азийн бүсэд Монгол улс хавдрын тохиолдлоор 4-т, хавдрын шалтгаант нас баралтаар 5-т жагссан.
