2024 оны 10-р сарын 25-нд Sak Sak нэртэй хаягаас “Ийм л байна” гэх тексттэй тахианы маханд төхөөрөмжөөр ямар нэг зүйл нэмэлтээр хийж буй мэт дүрслэл бүхий бичлэгийг түгээжээ. Тус бичлэг нь нийт 184 реакц, 43 сэтгэгдэл авч, 5,200 гаруй удаа цааш түгээгдсэн байна.
FACTCHECK: Бид дараах байдлаар баримт шалгалт хийлээ
Шалгасан бичлэгийн хэсгийг Google Lens хайлтын системээр хайхад @mspbra гэх Х (хуучнаар Твиттер) хаягт “Зул сарын аварга цацагт хяруулыг та мэдэх үү?“ гэх тайлбартайгаар нийтлэгджээ. Тус постын дор уншигчид хүмүүсийг мэдэхийг хүсэж магадгүй гэж бодсон контекстийг буюу тайлбарыг нэмсэн байна. Тайлбар хэсэгт “хоол хийхээс өмнө арьсыг махнаас нь салгахад агаар ашигладаг. Ингэснээр илүү шаржигнуур, Бээжин нугасны чухал амт чанар нэмэгддэг” хэмээн тайлбарлажээ.
Үргэлжлүүлэн Douyin (Хятадын ТикТок хувилбар)-аас “Нугасыг агаараар шахах үйлдвэр” (鸭子气压工厂) гэх түлхүүр үгээр хайхад шалгасан бичлэгийн эх хувилбар @博士鸭 郑州市区免费配送 董亚娟 хаягт 2024 оны 09-р сарын 26-нд нийтлэгджээ. Тус бичлэгээс харвал тахианы мах биш нугасанд хоолойгоор агаар шахаж буйг харж болох юм. Шахаж буй хоолойноос ямар нэг бодис гарахгүй байгааг харж болохоор байна. Мөн нугасны үйлдвэртэй холбоотой олон бичлэгийг цуврал болгон оруулдаг байна.
Хоолны тухай төрөл бүрийн бичлэг оруулдаг @eater youtube сувагт ахлах тогооч @Brandon Jew Бээжин нугасыг бэлдэхдээ арьсыг махнаас нь салгаж хүчтэй даралтад агаараар шахан бэлдэж буй бичлэгийг 2023 оны 05-р сарын 17-нд нийтэлжээ.
