2024 оны 10 дугаар сарын 15-ны өдөр Margadism гэх нэртэй Facebook пэйж “Утсаа барьж гараад л хороогоо тойроход л мөнгө цөм хийхээр сайхан бизнес байна даа” гэсэн агуулгатай, “Илрүүлсэн зөрчил бүрд 4000 төгрөг олгоно” гэх хадмал бүхий зурагтай пост түгээжээ. Уг пост нь 670 реакц, 120 сэтгэгдэл авч, 496 удаа цааш түгээгджээ.
FACTCHECK: Бид дараах байдлаар баримт шалгалт хийлээ
2024 оны 10 дугаар сарын 14-ний өдөр болж өнгөрсөн Нийслэлийн удирдах ажилтнуудын шуурхай зөвлөгөөний эхэнд “Замын хөдөлгөөний удирдлагын төв” ОНӨТҮГ-ын захирал Ч.Хувьзаяа авто замын түгжрэл, ачааллыг бууруулахын тулд дараах өргөн хүрээний ажлууд хийх талаар танилцуулжээ.
- Улаанбаатар хотын тээврийн хэрэгслийн бүртгэлийг бүрэн шилжүүлж авах
- Гэрлэн дохионы ухаалаг удирдлагыг бий болгох
- “Зогсоол” нэгдсэн хөтөлбөрийг хэрэгжүүлэх
- E-Police аппликейшнээр зөрчил мэдээлсэн иргэн, хуулийн этгээдэд урамшуулал олгох
- Зарим уулзвар замуудын хөдөлгөөн, зохион байгуулалтыг шинэчлэх гэжээ.
Бид E-Police гар утасны аппликэйшний урамшуулал хэсэг рүү орж үзэхэд “Замын хөдөлгөөний удирдлагын төв (ЗХУТ), Тээврийн цагдаагийн алба (ТЦА)-аас санал оруулсны дагуу Хууль зүй, дотоод хэргийн яаманд хэлэлцэгдэж байна” гэсэн байна. Үүнээс үзвэл уг аппликэйшнээр урамшуулал бодогдож эхлээгүй байна.
Дүгнээд хэлбэл, E-Polic аппликэйшнээр зөрчил илрүүлсэн зам тээврийн зөрчил бүрд урамшуулал олгох нь эцэслэн батлагдаагүй, мөн урамшууллын хэмжээ тодорхой бус байгаа аж.
