2024 оны 10 дугаар сарын 5-ны өдөр Nano Cadiso Mongolia нэртэй Фэйсбүүк пэйж “Ходоодны шарх, хүчиллэг рефлюкс, ходоодны хорт хавдрын хамгийн түгээмэл шалтгаан нь хеликобактери пилори бактери юм. Энэ нь хүчтэй нөлөө үзүүлж, өвчний шинж тэмдгийг улам дордуулах эрсдэлийг нэмэгдүүлдэг. Нас баралт маш өндөр, цаг алдалгүй, сайтар эмчлэхгүй бол 89% хүртэл байдаг. АНУ-ын FDA-аас баталгаажсан” гах агуулгатай бичлэг түгээжээ. Уг бичлэг 365 реакц, 861 сэтгэгдэл, 245 мянга гаруй үзэлт авчээ.

FACTCHECK: Бид дараах байдлаар баримт шалгалт хийлээ

Америкийн Хавдрын Нийгэмлэгээс гаргасан ходоодны хорт хавдрын судалгаагаар нас барах магадлалыг нь биш эсрэгээрээ амьд явах магадлалыг тооцоолж гаргажээ. Ижил төрлийн болон ижил үе дээр явж байгаа хорт хавдартай хүмүүсийн 70% нь дор хаяж 5 жил амьдарна гэжээ. Мөн үүнийгээ задлаад дараах хүснэгтээр үр дүн гаргажээ.

• Түгээсэн бичлэгт дурдсан 89% нь нас бардаг гэсэн тоо баримт нь худал болох нь үүгээр харагдаж байна.

АНУ-ын FDA-аас баталгаажсан гэдэг нь худал

АНУ-ын FDA буюу Хоол, хүнсний агентлагийн албан ёсны вэбсайт дээр “Ямар нэг нэмэлт бүтээгдэхүүн хэрэглэхээсээ өмнө FDA нь ямар нэг нэмэлт бүтээгдэхүүнд шошго нааж, баталгаажуулдаггүй. Гагцхүү тухайн нэмэлт бүтээгдэхүүний компаниуд өөрсдөө бүтээгдэхүүний шошго болон аюулгүй байдалд хариуцлага хүлээдэг” гэжээ.

• Тэгэхээр бидний шалгасан бичлэгт дурдагдсан “FDA-аас баталгаажсан” гэдэг нь худал болж байна.

Дүгнээд хэлбэл, ямарваа нэг өвчин, өвчлөлийг маш аюултай мэтээр айдас төрүүлээд, дэлхий дахин хүлээн зөвшөөрөгдсөн байгууллагаар баталгаажсан мэтээр сурталчилж бүтээгдэхүүнээ хэрэглүүлэх арга нь энэхүү хуурамч мэдээллээр илэрч байна. Иймд аливаа нэмэлт хүнсний бүтээгдэхүүнийг хэрэглэхээсээ өмнө мэргэжлийн эмч, байгууллагаас зөвлөгөө авч, албан ёсны вэбсайтаас нь баталгаатай мэдээлэл авч байхыг хүсье.