2024 оны 10 дугаар сарын 8-ны өдөр Сувд-Эрдэнэ Ганхуяг нэртэй Фэйсбүүк хэрэглэгч “9 ихэр гэнэ ээ, бурхан минь” гэх тайлбартай рийл түгээжээ. Уг рийл нь 3400 реакц, 156 сэтгэгдэл авч, 273 удаа цааш түгээгджээ.
Бид түгээсэн бичлэгийг зургаар хайж үзэхэд Huang Guoxian нэртэй Хятад эмэгтэй гарч ирлээ. Энэ эмэгтэй нь өндгөвчний хорт хавдрын улмаас гэдэс нь зогсолтгүй томорсоор байжээ. Энэ талаар 2020 онд Daily Mail болон бусад хэвлэл мэдээллийн алба мэдээлснийг энд, мөн эндээс үзээрэй.
Daily Mail-ийн мэдээлснээр “Huang Guoxian-ийн гэдэс сүүлийн 2 жилд шингэн болон бусад хавдраар дүүрч, зогсохгүй томорчээ. 15 эмчийн бүрэлдэхүүнтэй баг 8 цагийн турш үргэлжилсэн хагалгааг амжилттай хийж гүйцэтгэсэн” гэжээ.
Гаднын нийгмийн сүлжээгээр мөн энэхүү төөрөгдүүлсэн мэдээлэл ихээр түгсэн бөгөөд Энэтхэгийн Factly үүн дээр баримт шалгалт хийснийг эндээс үзнэ үү.
Дүгнээд хэлбэл, ямар нэг зургийг ашиглан агуулгыг гуйвуулан төөрөгдүүлж түгээх явдал цахим орчинд түгээмэл байдаг тул та зургаар хэрхэн хайлт хийхийг манай өмнөх баримт шалгалтаас орж үзээрэй.
