2024 оны 07-р сарын 11-нд Хорин Дөрвөн Цаг нэртэй Фейсбүүк пэйж “Cartoon Network албан ёсоор хаагджээ. Бидний хүүхэд насыг гайхалтай байлгасанд баярлалаа” гэж түгээжээ.
Cartoon Network хүүхэлдэйн киноны суваг хаагдсан гэх мэдээлэл хаанаас эхлэлтэй вэ?
Cartoon Network хүүхэлдэйн киноны суваг нь хаагдлаа гэсэн мэдээлэл цахим орчинд түгээд байгаа аж. 2024 оны 7 дугаар сарын 9-ний өдөр X (хуучнаар Твиттер) дээр Animation Workers Ignited гэх хаягаас дараах утга бүхий бичлэгийг түгээжээ.
Уг бичлэгт “Cartoon Network үндсэндээ үхсэн. Учир нь шуналаасаа болж уран бүтээлчдээ халж эхэлсэн. Том студиуд санхүүгээ сайн харагдуулахын тулд, зардлаа танаж, ажилчдаа халж эхэлдэг. Харин та үүний эсрэг дуу хоолойгоо хүргээрэй. “#RIPCartoonNetwork” (Тайван нойрс доо, Cartoon Network) гэх түлхүүр үгийг ашиглан Cartoon Network-ийн дуртай шоугаа дурдаарай. Хүүхэлдэйн киноны салбар дайралтад өртөөд байна. Та аль талд нь байна вэ?” гэжээ. Энэхүү пост нь 112 мянган лайк, 47.2 мянган рипост, 11 сая үзэлт авчээ.
FACTCHECK: Бид дараах байдлаар баримт шалгалт хийлээ
Cartoon Network-ийн албан ёсны Фейсбүүк пэйж болон вэбсайт дээр хаагдах гэж байгаа талаар ямар нэг мэдэгдэл, мэдээлэл байхгүй аж.
Мөн Cartoon Network энэхүү мэдээллийг няцааж, дараах тодруулгыг өгчээ.
“Cartoon Network хаагдаж байгаа гэсэн мэдээлэл нь худал бөгөөд дараа дараагийн шинэлэг уран бүтээлүүдийг дэмжиж, дэлхий дахины олон олон үзэгчээ хөгжөөх болно оо”
Дүгнээд хэлбэл, Cartoon Network-ийн ажилчдаа халж, санхүүгээ танаж байгааг нь эсэргүүцсэн постын #RIPCartoonNetwork гэсэн хайштайг-аас улбаалж уг хүүхэлдэйн киноны суваг хаагдсан гэх худал мэдээлэл тарж эхэлжээ.
