Парис хотноо болох 2024 оны Олимпын наадамд Монгол улсын тамирчдын өмсөх хувцасны загвартай холбоотойгоор нийгэмд хэлэлцүүлэг өрнөж эхэлсэнтэй зэрэгцээд хувцасны загварыг хятадаас хулгайлсан, оруулж ирсэн гэх мэдээлэл түгээд байна. Тодруулбал, 2024 оны 07-р сарын 09-нд Тимо Буруу Ишилсэн Сүх нэртэй хаягаас “Энэ хувцсыг урдаас оруулж ирж улсад шахахдаа гүлдийхгүй худал тууж байгаа хүнийг өмөөрөх нь хаашаа юм. Эмэгтэй тамирчны хувцас бүр яг дүрээрээ байгаа биз” гэх тайлбартайгаар хятад хэл дээр бичигдсэн постын зураг (screenshot)-тай хамт нийтэлжээ. Түүнчлэн Jonon TV нэртэй хуудаснаас “Цаана чинь хятадууд манай загвар хулгайлсан гээл маш их гомдолтой байна…” гэх тайлбартайгаар ижил зургийг түгээсэн байна.
Бид дээрх мэдээлэлд ашигласан зургийн эх сурвалжийг олсон бөгөөд тус зурагт Хятадаас хулгайллаа гэх ямар нэг агуулга байхгүй харин хувцасны загварыг сайшааж магтсан агуулгатай болохыг тогтоосон.
FACTCHECK: Бид дараах байдлаар баримт шалгалт хийлээ
Шалгасан мэдээлэлд хавсаргасан зурагт @Ww гэх хаягаас хятад хэл дээр бичигдсэн. Тиймээс бид Weibo-с (хятадын блог вэбсайт) “Парисын Олимп Монгол хувцас” (巴黎奥运会·蒙古国礼服) гэх түлхүүр үгээр хайхад 升到第五维 нэртэй хаягт @Ww хаягийг дурдаж Xiaohongshu (хятадын сошиал медиа платформ) сайтын линкийг хавсаргажээ.
Тус линкээр ороход шалгасан мэдээллийн эх хувилбарыг 06-р сарын 29-нд Өвөр Монголд байрлалтай @Ww гэх хаяг “Монгол улсын 2024 оны Парисын Олимпод оролцох хувцас үзэсгэлэнтэй юм. 1,4 тэрбум хүн дунд загвар зохион бүтээгч алга уу? Бүгд залуу зохион бүтээгчид оролцож бүтээсэн юм байна. Манайхыг хэн зохиосон юм бэ? Мэдмээр байна” гэх тайлбартайгаар нийтэлжээ.
Мөн @Ww хаягт нийтлэгдсэн зургийн дээд талд нь TsoilogsoZ, Монголын Үндэсний Олимпын хороо, Ug Arena болон Go Mongolia-ийн лого байгааг харж болох юм. Уг зургийн эх хувилбар нь 05-р сарын 19-нд ЦойлогсоZ-ийн албан ёсны фейсбүүк хуудаст постлогдсон бөгөөд UG Arena-д зохион байгуулагдсан “Youth Confrence 2024” арга хэмжээний үеэрх зураг ажээ.
Weibo-д нийтлэгдсэн постоос үзэхэд Олимпод оролцох тамирчдын хувцасны загварыг Хятадаас хулгайлсан гэх агуулга огт байхгүй ба Хятадаас хулгайлсан гэх пост нь зориуд мушгин гуйвуулсан агуулгатай байхаар байна.
Хэдийгээр нийгмийн сүлжээнд Олимпод оролцох тамирчдын хувцас Хятад, Манж загвартай ойролцоо тухай яриа өрнөж буй ч дээрх мэдээлэл нь Хятадаас хулгайлсан гэх агуулгыг илэрхийлээгүй болохыг харж болохоор байна.
