2024 оны тавдугаар сарын 31-нд Bill Bill гэх хаягаас “Энэ үзэгдэлтэй холбоотой баримт бичлэгүүд олон улсад шуугиан тарьж байна. Мэдээж сансар огторгуйд болсон энэ үзэгдэл зөвхөн Монголд биш бүхийл газар үзэгдсэн бөгөөд нилээдгүй олон мянган баримт бичлэг гэрэл зургууд интернэт орчинд тархаад байна” тайлбартайгаар сар дэлбэрч буй богино хэмжээний бичлэгт “2024.05.26 Дорнод” гэх тексттэй нийтэлжээ. Тус бичлэг нь нийт 3.7 мянга гаруй реакц, 487 сэтгэгдэл ач, 876 удаа цааш түгээгдэж, 869 мянга гаруй хэрэглэгч үзжээ.

FACTCHECK: Бид дараах байдлаар баримт шалгалт хийлээ

Шалгасан бичлэгт сар дэлбэрч буй мэт олон бичлэгийг нийлүүлэн эвлүүлсэн. Бичлэгийн нэг хэсгийг Google lens хайлтын системээр хайхад @meteroshorts youtube сувагт бичлэгийн эх хувилбар нийтлэгджээ.  

Тухайлбал, @meteroshorts youtube сувагт 2024 оны гуравдугаар сарын 18-нд (бичлэг 1),  2023 оны дөрөвдүгээр сарын 20-нд (бичлэг 2), 2023 оны зургаа дугаар сарын 13-нд (бичлэг 3) нийтлэгдсэн гурван бичлэгийг эвлүүлэн түгээжээ. Тус youtube сувагт орсон богино хэмжээний бичлэгүүдэд “жинхэнэ биш” гэх тайлбарыг оруулсныг доорх зургаар харах боломжтой юм.

Мөн бичлэг бүрт “Blender ашиглан бүтээсэн” гэх тайлбарыг хавсаргасан байна. Blender нь хүүхэлдэйн кино, визуал эффект, бүтээл, 3D хэвлэсэн загвар, хөдөлгөөнт график, интерактив 3D программууд, видео тоглоом зэрэг бүтээхэд ашигладаг үнэгүй, нээлттэй эх сурвалжтай 3D компьютер графикийн программ юм.