2022 оны 10 дугаар сарын 16-нд zuvlugch.com вэб сайт “Элэгээ цоо эрүүл болгож чадсан! мэргэжилтэний жорыг сураад аваарай” гэсэн гарчигтай мэдээлэл нийтэлсэн. Уг мэдээнд тайлбарласнаар сармис, нимбэг, цагаан гаа хольсон уусмал нь “элэг цоо эрүүл болгох” буюу цусны эргэлтийг сайжруулж, дархлааг бэхжүүлж, чөлөөт радикалуудын нөлөөг бууруулдаг, элэг цэвэрлэдэг гэжээ.
2022 оны 10 дугаар сарын 16-нд zuvlugch.com вэб сайт “Элэгээ цоо эрүүл болгож чадсан! мэргэжилтэний жорыг сураад аваарай” гэсэн гарчигтай мэдээлэл нийтэлсэн. Уг мэдээнд тайлбарласнаар сармис, нимбэг, цагаан гаа хольсон уусмал нь “элэг цоо эрүүл болгох” буюу цусны эргэлтийг сайжруулж, дархлааг бэхжүүлж, чөлөөт радикалуудын нөлөөг бууруулдаг, элэг цэвэрлэдэг гэжээ. Тус мэдээг Crowdtangle аппликейшнаар шалгаж 2022 оны 11 дүгээр сарын 30-ний байдлаар 2191 реакц, 138 коммент авч, 5452 удаа цааш түгээгдээд байна. Түүнчлэн, фэйсбүүкт энэ мэдээлэл Сошиал Мэдээ, Reach Media зэрэг хуудсуудаар дамжин түгсэн байна. Дээрх мэдээллийг Олон улсын баримт шалгах сүлжээний (IFCN) баталгаажуулалттай Africa Check зэрэг баримт шалгах байгууллагууд худал гэдгийг нь тогтоосон. Бид шалгаж буй мэдээлэлтэй холбоотой нээлттэй судалгаа, мэдээллүүдийг ашиглан дараах байдлаар баримт шалгалт хийлээ.
1. Сармис, нимбэг, цагаан гаа элэг цэвэрлэдэг нь батлагдаагүй
Элэг нь цусан дахь ихэнх бодисын хэмжээг зохицуулдаг ба метаболизмд чухал үүрэг гүйцэтгэдэг. Цаашлаад, элэг нь хүний биед 500 гаруй үүрэг гүйцэтгэдэг гэж Жонс Хопкинсын их сургуулийн Эрүүл мэндийн сургуулийн вэбсайтад мэдээлжээ. Хэдийгээр сармис, нимбэг, цагаан гаа нь хүнсэнд өргөн ашиглагддаг, эрүүл мэндийн эерэг нөлөөтэй ч дээрх бүтээгдэхүүнүүдийн холимог уусмал нь аливаа элэгний өвчнийг эмчлэх эмчилгээний жор болохгүй юм. Өөрөөр хэлбэл, эдгээрийг тодорхой хэмжээнд, давтамжтай хольж уухыг зааварчилсан эмчилгээний жор байхгүй юм. Africa Check-ийн мэдээлснээр сармис, цагаан гаа, нимбэг зэрэг нь элгийг цэвэрлэхгүй бөгөөд тэдгээрийн холимог нь цусны эргэлтийг сайжруулах, дархлаа дэмжих зэрэгт эмчилгээний жор болохыг зөвлөсөн шинжлэх ухааны баримт байхгүй гэжээ.
2. Эдгээр бүтээгдэхүүнийг тогтмол хэрэглэхийг зөвлөсөн хангалттай хэмжээний клиник дата цуглараагүй
Өмнөд Австралийн их сургуулийн Хоолны шинжлэх ухаан, шим тэжээлийн хөтөлбөрийн дарга Эванжелин Мантзиорисын (Evangeline Mantzioris) тайлбарласнаар “хүний бие нимбэгтэй усны шаардлагагүйгээр элэгний тусламжтайгаар бие бохирдолоос цэвэрлэж” гадагшлуулдаг гэжээ. Түүнчлэн, Жонс Хопкинсын их сургуулийн Эрүүл мэндийн сургуулийн хоол боловсруулах систем, элэгний эмч Тинсаи Амбачев Воретагийн (Tinsay Ambachew Woreta) мэдээлснээр “элэг цэвэрлэнэ гэсэн жоруудын нийтлэг орц нь элэгний үйл ажиллагаанд эерэг нөлөөтэй талаар судалгаанууд байдаг боловч эдгээр бүтээгдэхүүнийг тогтмол хэрэглэхийг зөвлөсөн хангалттай хэмжээний клиник дата цуглараагүй” байгааг онцолсон байна.
