Байцайны шүүсээр ходоодны шархыг эмчилнэ гэх мэдээлэл бүрэн бус

Checked by: MFCC

Ерөнхий агуулга

Байцааны шүүс ууснаар ходоодны шархыг эмчилж чадна гэх агуулга бүхий мэдээлэл түгээжээ.

Баримт шалгалтын үр дүн

Байцайг ходоодны гарханд ашиглах эмчилгээ нь ихэвчлэн хуучин судалгааны ажлууд дээр үндэслэсэн байна. Мэргэжлийн эмчийн зөвлөсөн эмийг хэрэглэж, дэглэмийг дагаснаар гаж нөлөө багатай, үр дүнтэй эмчилгээ хүртэх боломжтой юм.

2021 оны 11 дүгээр сарын 22-нд “Нархан – Гэрэлт ирээдүйг хамтдаа” нэртэй пэйжид “Ээж маань ходоодны шархаа үүнийг уугаад л эмчилж чадсан” гэсэн гарчигтай Narhan.me домайн нэртэй сайтын холбоосыг хавсаргасан пост оруулсан нь 2022 оны 11 дүгээр сарын 30-ны байдлаар 243 реакц, 8 сэтгэгдэл авч, 907 удаа цааш түгээн идэвхжүүлсэн байна.

2021 оны 11 дүгээр сарын 22-нд “Нархан – Гэрэлт ирээдүйг хамтдаа” нэртэй пэйжид “Ээж маань ходоодны шархаа үүнийг уугаад л эмчилж чадсан” гэсэн гарчигтай Narhan.me домайн нэртэй сайтын холбоосыг хавсаргасан пост оруулсан нь 2022 оны 11 дүгээр сарын 30-ны байдлаар 243 реакц, 8 сэтгэгдэл авч, 907 удаа цааш түгээн идэвхжүүлсэн байна. Тухайн домайн дээр байршсан мэдээний тархалтыг Crowdtangle tool ашиглан шалгаж үзэхэд Facebook сүлжээнд нийт 9,786 удаа хариу үйлдэл үзүүлсэн байна. Narhan.me домайн дээр байршсан мэдээ нь: “Тэгвэл та энэ төвөгтэй асуудлаас байцааны шүүсний тусламжтайгаар салж чадна. Байцаа нь олон төрлийн витамин, амин дэмийн эх үүсвэр билээ. Мөн глютамины хvчил агуулдаг тул ходоод гэдэсний үйл ажиллагаанд эерэг нөлөөтэй төдийгүй ходоодны шарх болон үрэвслийг эмчилдэг. Ходоодны рН тэнцвэрийг хадгалах чадвартай тул байцааны шүүс нь гэдэсний цочрол, ходоод гэдэсний өвчнийг эдгээж өгдөг. Зарим хүмүүс бидний танилцуулах байцааны шүүсийг ердөө 2-3 удаа уугаад л өвдөлт нь байхгүй болсон гэдэг. Харин зарим хүмүүст 2-3 долоо хоног шаардлагатай болсон тохиолдол ч байдаг. Нэг ёсондоо энэ нь тухайн хүний биеийн онцлогоос хамаарах юм. Тиймээс шантралгүй шүүсээ сайн ууж, ходоодны шархаа эмчлээрэй.Амтыг нь сайжруулахын тулд та лууван, цоохор майлз, цэцэгт байцаа нэмж, гэмтсэн ходоодонд зөөлнөөр нөлөөлж, өтгөн хатах, гэдэс дүүрэхээс сэргийлж болно” гэсэн байна.

1. Олон улсын баримт шалгагчид энэхүү мэдээллийг шалгаж, олон жилийн өмнөх үр дүн багатай арга гэж үнэлжээ

IFCN Буюу Олон улсын баримт шалгагчдын сүлжээний гишүүн Africacheck Баримт шалгах төв 2022 оны 06 дугаар сарын 29-нд байцайны шүүстэй холбоотой баримт шалгалтыг вэбсайтдаа нийтэлсэн байна. Нийтлэлд: “Байцайны шүүс ходоодны шархыг эмчилнэ гэх мэдээлэл нь ихэвчлэн хуучирсан судалгааны ажлууд дээр үндэслэсэн байна. Хамгийн анх 1949 онд 13 өвчтөнийг хамруулан байцайны шүүс ходоодны шарханд хэрхэн нөлөөлөх вэ гэдгийг тогтоох туршилт хийжээ. Эрдэмтэд ходоод гэдэсний замыг мэдрэг болгох нөлөөтэй харшил үүсгэгч болох гистамины нөлөөт ходоодны шархны үед байцайны шүүс тустай байж болно гэж үзсэн байна. Үүнээс хойш 2014 онд эрдэмтэд байцайнд агуулагдах витамин U нь хөнгөн хэлбэрийн ходоодны шархны үед эдгэрлийг дэмжих үйлчилгээтэйг тогтоожээ. Гэвч энэ нь байцайны шүүс бүх ходоодны шарханд сайнаар нөлөөлж чадна гэсэн үг биш. Учир нь ходоодны шархыг ямар шалтгаанаар үүссэнээс нь хамааран эмчилгээг тохируулах шаардлагатай. Их Британийн Үндэсний эрүүл мэндийн алба бактерийн гаралтай ходоодны шарханд антибиотик, эмийн хэрэглээнээс үүдсэн ходоодны шарханд стеройдын бус бэлдмэл уухыг зөвлөдөг байна. Баримт шалгалтын дагуу Өмнөд Африкийн Витс Доналд Гордон эрүүл мэндийн төвийн Хоол боловсруулах замын эмгэг судлаач, доктор Кэй Карлсонтой холбогдоход “Байцайг ходоодны шарханд ашиглах эмчилгээ нь 1940-1950 оны үед байсан хоцрогдсон арга бөгөөд орчин цагийн эмтэй ижил үр дүнтэй биш. Мөн хүмүүст өдөрт хэт их тунгаар хэрэглүүлдэг байснаас болоод гэдэс дүүргэх, эвгүй мэдрэмж төрүүлэх гаж нөлөөтэй байсан. Харин ч одоо мэргэжлийн эмчийн зөвлөсөн эмийг хэрэглэж, дэглэмийг дагаснаар гаж нөлөө багатай ч үр дүнтэй эмчилгээ хүртэх боломжтой” гэж хариуллаа” гэсэн байна. Солонгосын эрдэмтдийн судалгааны ажлыг 2019 оны 06 сард “Шим тэжээл” олон улсын эрдэм шинжилгээний сэтгүүлд нийтлүүлжээ. Тайланд “Витамин U буюу ходоод гэдэсний өвчний үед ач тустай бодис нь: -Байцай -Брокколи -Цэцэгт байцай -Буржгар байцай зэрэгт агуулагдана” гэсэн байна. Нигерийн Dailytrust агентлагийн 2022 оны 10 дугаар сарын 30-нд вэбсайтдаа байршуулсан “Исгэсэн байцай ходоодны шарх эмчилдэг үү” нэртэй баримт шалгалтад: “Хоол боловсруулах замын эмгэг судлаач Прэшис Энягбэрүтэй холбогдон тодруулахад “Зөв хооллож, амьдралын зөв хэвшилтэй л болчиход ходоодны шархтай нийт өвчний 50 хувь нь өөрөөрөө эдгэх боломжтой байдаг. Гэвч ходоодны шархаа эдгээнэ гэж ямар нэг цуу ярианд итгэн бүтээгдэхүүн хэрэглээд, бусад хүчин зүйлсээ анхаарахгүй бол эдгэх боломжгүй. Харин нэгэнт өөрөөрөө эдгэх боломжгүй болсон хүнд шатны ходоодны шархтай хүмүүс үлдсэн амьдралаа эмчийн хяналтад, төрөл бүрийн эм ууж өнгөрөөхөөс өөр аргагүй. Хүнд хэлбэрт шилжсэн үед зовуурийг л намдаах хэрэгтэй. Байцай үнэхээр ходоодны шархыг эдгээнэ гэж итгэж байгаа бол хэрэглээд үзэхэд гэм хор байхгүй. Гэхдээ байцайны шүүсэнд найдаад бусад эмчилгээгээ тасалдуулж болохгүй” болохыг анхаарууллаа” гэсэн байна.

2. Нэмэлт мэдээлэл:

Баримт шалгах төвүүдийн тайланд дурдсанчлан та ходоодны шархтай бол юун түрүүнд мэргэжлийн эмчийн зөвлөгөөг дагах нь чухал. Их Британийн Улаан хоолой, хоол болоюсруулах замын хавдрын үеийн зөвлөмж вэбсайтад: “Ходоодны шархтай үед -Пробиотик -Исгэлэн хүнс -Брокколи -Жимсгэнүүд -Зөгийн бал -Оливын тос хэрэглэхэд тохиромжтой. Харин согтууруулах ундаа, тос ихтэй хүнс, хүчиллэг хүнс, боловсруулсан бүтээгдэхүүнээс зайлсхийх нь зүйтэй” гэсэн байна.


Аливаа мэдээллийг хуваалцахаасаа өмнө #ЭхлээдБод #Think1st


Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакторын hello@mfcc.mn имэйл хаягаар ирүүлнэ үү.

Leave a Reply

Сэтгэгдэл үлдээх

Хуваалцах

Бид Олон Улсын Баримт Шалгагчдын Сүлжээ (International Fact-Checking Network)-ний ёс зүйн кодын дагуу аливаа мэдээллийг баримтаар баталгаажуулан шалгадаг. Баримтаар шалгасан мэдээллээ #ҮНЭН, #ХУДАЛ, #ТӨӨРӨГДҮҮЛСЭН, #БҮРЭН БУС, #ЭВЛҮҮЛЭГ, #ЕГӨӨДӨЛ гэсэн зургаан төрлөөр ангилж, олон нийтэд үнэн бодит мэдээлэл түгээн ажиллаж байна.

Check document