2023 оны 01 дүгээр сарын 28-нд RK Store нэртэй пэйжид “Бидэнд бага зэргийн зурааснаас болж зарагдах боломжгүй олон арван iphone 7,7plus,8,8plus,x загварын гар утас байгаа. Шэйр хийсэн, пэйжд лайк дарсан хүн бүрт өгөхөөр шийдлээ. 2-р сарын 7-ны 19:00 цагаас өмнө” гэх гарчигтай постыг, утасны зургуудын хамт нийтэлсэн нь 2023 оны 01 дүгээр сарын 31-ний байдлаар 2,4 мянган реакц, 1.4 мянган сэтгэгдэл авч, 9.4 мянган удаа цааш түгээсэн байна.
FACTCHECK: Бид дараах байдлаар баримт шалгалт хийлээ.
1. Хаяг, агуулгыг нягтлах
Мэдээлэл оруулсан хаягийн 2022 оны 01 дүгээр сарын 25-нд үүсгэсэн байх ба пэйжийн ангилал нь “Худалдааны төв” гэсэн байна. Гэвч профайл зургийг нь Google Reverse image search хэрэглүүр ашиглан хайхад Бахрайн улсад үйл ажиллагаа явуулдаг RK Store нэртэй гоо сайхны бараа бүтээгдэхүүний онлайн дэлгүүрийн илэрц байна. Гадаадад үйл ажиллагаа явуулдаг онлайн дэлгүүрийн логог ашиглан, гар утас тараах нэрийдлээр цахим хэрэглэгчдийг хууран мэхэлжээ.
2. Хавсаргасан бүтээгдэхүүнүүдийн зураг хуурамч
Шалгасан мэдээлэлд хавсаргасан бүтээгдэхүүнүүдийн зургийг Google Reverse image search хэрэглүүр ашиглан хайхад зургуудыг өөр, өөр эх сурвалжуудаас хуулбарлан авчээ.
- -Iphone 7, 7+ бүтээгдэхүүнүүдийн зургийг ebay худалдааны платформд байршуулсан зараас
- Iphone X Бүтээгдэхүүний зургийг Merkandi худалдааны платформд байршуулсан зараас
- Хайрцагтай ачаануудын зургийг The Lof цахим тоглоомын төвийн пэйжид байршуулсан постноос тус, тус хуулбарласан байна.
3. Анхааруулга
Энэ төрлийн хуурамч зар нь ихэвчлэн пэйжийн хандалтыг өсгөх зорилготой байх хэдий ч зарим тохиолдолд хэрэглэгчид бүтээгдэхүүн хожсон гэж худал мэдээлж, “Энэ дансруу мөнгөө шилжүүлээд”, “Энд дансны дугаар, гэрийн хаягаа оруулаарай” гэх мэт нөхцөл тавьж таны санхүүгийн аюулгүй байдалд халдахыг завддаг. Иймд та энэ төрлийн амар, хялбар аргаар мөнгө олох, бэлэг хожих зэрэг худал мэдээлэлд болгоомжтой, хянуур хандах нь зүйтэй.
