2023 оны 02 дугаар сарын 08-нд ‘TV8 Mongolia’ фэйсбүүк хуудас Туркийн ерөнхийлөгч Эрдоганы уйлж буй бичлэгийг постлон ‘Бүгд Найрамдах Турк улсын Ерөнхийлөгч Рэжэп Тайип Эрдоган ’ гэсэн гарчигтайгаар нийтэлсэн. Уг постыг 02 дугаар сарын 06-нд эхэлсэн Турк, Сирийн газар нутгийг дамнасан газар хөдлөлтийн үеэр нийтэлсэн нь тус улсын ерөнхийлөгч Эрдоган уг үйл явдалд гашуудан уйлж буй мэтээр ойлгогдохуйц болжээ. Үүнийг тухайн нийтлэлд цахим сүлжээ хэрэглэгчдийн үзүүлсэн хариу үйлдэл, коммент зэргээс харж болно.
FACTCHECK: Бид дараах байдлаар баримт шалгалт хийлээ
1.Эрдоганы бичлэг Турк, Сирийн газар хөдлөлтийн дараа бус 2016 онд хийгдсэн
Бичлэгийн онцлох хэсгүүдийг зургаар авч зургуудыг reverse image search функциар хайж үзэхэд энэ нь дээр дурдсан газар хөдлөлтийн дараа биш 2016 онд болсон хурлын үеэрх бичлэг болох нь илэрцээр гарч ирсэн. Тодруулбал, тус бичлэг нь 2016 оны 11 дүгээр сарын 01-03-ны хооронд Туркийн нийслэл Истанбулд болсон Исламын хамтын ажиллагааны байгууллагын хуралд ерөнхийлөгч Эрдоган оролцох үеэр хийгдсэн бичлэг юм.
Бүр тодруулбал энэ нь “Долдугаар сарын 15-ны эмэгтэйчүүд” нэртэй баримтат кино үзэж байх үеийнх нь сэтгэл хөдлөлийг буулгасан дүрс болохыг CNN Türk мэдээлсэн байна. Хурлын бичлэгт түүний хажууд хар алаг хижаб өмссөн эмэгтэй сууж байгаа нь харагдана. Мөн тус баримтат киног үзэж байсан ерөнхийлөгч Эрдоганы эхнэр Эмине Эрдоган болон ерөнхий сайд Бинали Йылдырымийн эхнэр Сэмиха Йылдырым нар ижил сэтгэл хөдлөлтэй байсныг Туркийн мэдээллийн Yeni Şafak вэб сайт видеондоо харуулсан байна.
Исламын хамтын ажиллагааны байгуулага нь хоёр жил тутам эмэгтэйчүүдийн асуудлаар сайд нарын түвшинд хуралддаг ба тус байгууллагад Исламын шашинтнууд зонхилсон болон Ислам шашинт хүн амтай дэлхийн 57 орон гишүүнээр элссэн байдаг байна.
