Улаанхуаранд нээгдсэн ресторан гэх бичлэг ЕГӨӨДӨЛ

[ЕГӨӨДӨЛ] 2022 оны 06 дугаар сарын 1-нд Дагдангийн Анхбаяр нэртэй хэрэглэгчийн хаягаас “Улаанхуаранд ийм нэртэй газар нээгдсэн байна… #гэнээ” гэх тайлбартай усан дээрх рестораны бичлэг оруулсан нь 06 дугаар сарын 10-ны байдлаар 1.4 мянган реакц, 199 сэтгэгдэл авч, 271 удаа цааш түгээсэн байна.
Уг бичлэгийг Монголд биш гэдгийг мэдэхгүй хүн байж болзошгүй тул хөндлөнгийн баримт шалгах хөтөлбөрийн ЕГӨӨДӨЛ гэх шошгыг танилцуулахын зэрэгцээ бичлэгийн эх сурвалжийг хэрхэн олох аргыг дахин сануулъя.

#FactCheckedByMFCC

🔍Бид дараах байдлаар баримт шалгалт хийлээ.

📌Уг постын линкийг inVID хэрэглүүрт Video analyses нүдэнд хуулж тавихад видеоны онцлох дүрсүүдийг зураг болгон харуулдаг. 📌Дараа нь тухайн зургуудаа Google, Yandex, Tineye болон Twitter-т хайх цэсүүдээс сонгож дараад үр дүнг нь хараарай.
📌Эндээс Google дээрх илэрцүүдийг сонговол Турк дэх Yuvarlakçay Defne буюу Дугуй Дефне гэх нэртэй ресторан гэдгийг мэдэж болно.
📌Yuvarlakçay Defne гэдэг үгээ Google map дээр оруулахад Туркийн Анаталягаас баруун хойно орших Yuvarlakçay буюу Дугуй гэх газарт байрлах ресторан, амралт зугаалгын цогцолборын хаягууд гарч ирнэ.

☝Энэ төрлийн мэдээлэл олон нийтэд хор хохирол учруулахгүй байж болох ч ташаа мэдээлэлд итгэгсдийг нэмэгдүүлж болзошгүй. Тиймээс Мета-гийн баримталдаг бодлого дахь "Егөөдөл" гэх шошгыг хэрэглэдэг. Бид бичлэгийн эх сурвалжийг хайх inVID хэрэглүүрийг хэрхэн ашигласан талаараа хуваалцлаа.

Та бүхэн манай төвийн баримт нягталсан мэдээтэй холбоотой аливаа санал хүсэлт, залруулга хийлгэх болон бусад санал гомдлоо редакторын hello@mfcc.mn имэйл хаягаар ирүүлнэ үү.

Аливаа мэдээллийг түгээхээсээ өмнө #Эхлээдбод     #Thinkfirst